पाऊसवेळा

रिमझिमत्या अंबरात आता

पाऊसवेळा आल्या ग ।

कृष्णपिसारा फुलवीत सार्‍या

घन घनमाला झाल्या ग ।

क्षणात गेले उष्ण उसासे,

तप्त धरेवर धारा ग ।

कुणी फिरवला रंगमंच हा,

कुठून आला वारा ग ।

न्हावून गेले घर, धरणी, तरू,

धावून आल्या धारा ग ।

नाचत आले तुषार ओले

कुणी छेडल्या तारा ग ।

कातर झाले मन अवघे अन

कातरवेळा झाल्या ग ।

कितीक पाऊस असे झेलले,

हळव्या झाल्या राना ग ।

असाच तुफान करतो पाऊस,

मनात माझ्या सारा ग ।

रिमझिमत्या अंबरात आता

पाऊसवेळा आल्या ग ।

नरेंद्र प्रभू

०७/०६/२०१५