24 July, 2018

मेमरीज - रेखा भिवंडीकर यांची उत्कट चित्रं





सुप्रसिद्ध चित्रकार रेखा भिवंडीकर यांनी अलिकडच्या काळात साकार केलेल्या चित्रकृतींचं मेमरीजहे एकल प्रदर्शन जहांगीर आर्ट गॅलरी, महात्मा गांधी मार्ग, काळा घोडा, मुंबई ४०० ००१ येथे मांडण्यात आलं आहे.  सदर प्रदर्शन दि. २३ ते २९ जूलै  २०१८ या काळात सकाळी ११ ते सायंकाळी ७ या वेळेत सर्व कलारसिकांना विनामुल्य खुलं राहील.

चित्रकार रेखा भिवंडीकर यांनी त्यांच्या बालपणी आपल्या कुटुंबाच्या विशेषत:  आईच्या सहवासात जे आनंदाचे क्षण अनुभवले त्याचं साधंसरळ पण उत्कट चित्र आपल्या अनोख्या शैलीत रेखाटलं आहे. बालपणापासून चित्रकलेचा ध्यास घेतलेल्या या चित्रकर्तीने मुंबईच्या सर जे. जे. स्कुल ऑफ आर्ट्स मधून आपला कलेचा अभ्यास पुर्ण केल्यावर वारली आणि मधुबनी चित्रशैलीचा विशेष अभ्यास केला, पण आता सादर होणारी ही चित्रमालिका त्यांच्या स्वत:च्या शैलीची ठसा उमटवणारी आहे. बालपाणीच्याआठवणींचं त्यांचा प्रतिभेने घेतलेलं रुप आणि मोजक्या रेषांमधून सादर होणारं आई आणि मुलीच्या भावबंधाचं आगळं स्वरूप या प्रदर्शनात अनुभवता येणार आहे.

मुलीच्या भावविश्वातली चाळीतली खोली, तीचं कुटुंब, सहज वृत्तीने डोकाऊन पहाणारे शेजारी, पायाशी घोटाळणारी मांजरी, गावचं घर, आजीचा वावर, प्राजक्ताचं झाड, आईचं वात्सल्य अशा दृश्यांच्या साथीने भूतकाळ उलगडत जातो आणि दर्शक आपसूकच स्वत:चा भूतकाळ यात शोधू पहातो. चित्रकर्तीने आठवणीतील प्रतिमा आणि आपल्या अंतरमनातील हळूवार भावनांना या चित्रमालिकेत दृश्य रुप दिलं असून ते खरंच प्रत्ययकारी झालं आहे.

जलरंगांच्या सहाय्याने कॅनव्हासवर साकार झालेली ही चित्रं म्हणजे आठवणींचा सुगंधीत दरवळ असून मुंबईकर कलारसिकांनी याचा जरूर लाभा घ्यावा.     
  

20 July, 2018

ओंजळीत स्वर तुझेच...





मराठी साहित्यात आपल्या विलक्षण प्रतिभेची कविता मागे ठेवून गेलेला कवी म्हणजे विंदा करंदीकर. विदांच्या त्या काव्यप्रतिभेचा समग्र आढावा घेणारा एक अप्रतिम कार्यक्रम काल आकाशवाणी मुंबईच्या सभागृहात झाला. औचित्य होतं भारतीय प्रसारण दिन, आकाशवाणी मुंबईचा ९१ वा वर्धापन दिन आणि विंदांचं जन्मशताब्दी वर्ष.  आज माध्यमांच्या गजबजाटात आणि टिपेच्या स्वरात सुन्न करणारे आवाज कानावर पडत असताना गेली ९ दशकं आकाशवाणीने जो अभिजातपणा आणि श्रोत्यांच्या मनाचा ठाव घेणारा गोडवा जपला आहे त्याला तोड नाही. काल १९ जुलै २०१८ ला आकाशवाणीच्या तुडुंब भरलेल्या सभागृहात पुन्हा एकदा त्याचा प्रत्यय आला.       

ओंजळीत स्वर तुझेच... अर्थात विंदांचं साहित्यदर्शन हा खास कार्यक्रम आकाशवाणी मुंबईने आयोजित केला होता. श्रोत्यांच्या समृद्धीच्या प्रवासात आकाशवाणीचं तब्बल नऊ दशकं योगदान! असं व्यासपीठावर लिहिलं होतं ते सार्थच आहे असं मी नक्कीच म्हणू शकतो. प्रसारमाध्यमांचं कुठलंही वारं नसलेल्या माझ्या कोकणातल्या गावी आकाशवाणीची झुळूक हाच आमच्यासाठी त्या काळात ज्ञानामृत पाजणारा अखंड झरा होता आणि आजही आहे.  काल सादर झालेल्या कार्यक्रमाचं  सुत्रसंचालन  डॉ. वीणा सानेकर यानी केलं होतं तर तुषार दळवी, शंतनू मोघे, अनघा मोडक, नंदेश उमप, सुचित्रा भागवत, डॉ. पुर्णिमा पटवर्धन, मंदार आपटे या नावाजलेल्या कलाकारांनी  या कार्यक्रमात भाग घेतला होता. सिंथसायझरसह बारा वांद्यांचा वाद्यवृंद आणि विंदांच्या कवितांना अभिजित लिमये यांनी दिलेलं संगीत तर लाजवाब!

विंदांच्या कवितांचा बाज हा विलक्षण वेगळा. विंदांनी प्रेमकविता, तालचित्रे, सामाजिक जाणिवेची कविता, व्यक्तिचित्रे, सूक्ते, बालकविता, विरूपिका आणि गझल या सर्वांचा धांडोळा या अडीज तासांच्या मंत्रमुग्ध करणार्‍या कार्यक्रमात घेतला गेला.

 ‘मागू नको सख्या रे माझे राहिलेले’, ‘फाटेल शीड जेव्हा’, ‘माझ्या घरी मी पाहुणी’, ‘मी चांद झेलला गं, घेऊन जा सर्व माझे’. अशांसारख्या कविता म्हणजे प्रेमात वाटय़ाला येणाऱ्या विरहाची, वेदनेची, दु:खाची, वर्षांनुवर्ष झालेली मुस्कटदाबी. स्त्रीला जितकं काही सोसावं लागतं त्याचा हा दस्तावेज या कार्यक्रमात मांडला गेलाच पण विंदांचे लघुनिबंध आणि स्वगतं अतिशय परिणामकारक रुपात सादर केले गेले.

सहाय्यक केंद्र निदेशक सुजाता परांजपे यांची संकल्पना असलेला, विंदांची पुस्तकं पुन्हा एकदा हाती धरायला लावणारा हा कार्यक्रम शनिवार दि. २१ जुलै २०१८ रोजी दुरदर्शनच्या सह्याद्री  वाहिनीवर सायंकाळी ५.३० वाजता तर महाराष्ट्रातल्या सर्व आकाशवाणी केंद्रांवरून सोमवार दि. २३ जुलै २०१८ ला रात्री. ९.३० ते ११ या वेळात प्रसारीत केला जाणार आहे.  जगभरातील श्रोत्यांनी या सुवर्णसंधीचा लाभ घ्यावा.     

नरेंद्र प्रभू


19 July, 2018

तथागताच्या वाटेवरती





डिस्कव्हरी ऑफ तथागताज फूट प्रिंट हे कॉफी टेबल बुक म्हणजे एखाद्या गोष्टीचा ध्यास घेतल्यावर एक सामान्य माणूस किती असामान्य कार्य  पूर्ण करू शकतो त्याचं उत्कृष्ट उदाहरण आहे. सूप्रसिद्ध  छायाचित्रकार विजय मुडशिंगीकर हे पाठीच्या ण्याच्या दुखण्याने त्रस्त होऊन रुगणालयात  दाखल होतात, सगळीच हालचाल बंद झाली असताना आपण वाचू शकतो हे लक्षात आल्यावर आपला वाचनाचा छंद ते तिथेही जोपासतात. त्यांच्या वाचनात गंगा नदीचं प्रदूषण येतं. या दुखण्यातून बरा झालो तर गंगा नदीचं प्रदूषण दूर करण्यासाठी काम करेन असा संकल्प ते मनोमन सोडतात, जगप्रसिद्ध निरोसर्जन डॉक्टर प्रेमानंद रामाणी यांनी शस्त्रक्रिया केल्यावर विजय मुडशिंगीकर पुन्हा एकदा आपल्या पायावर उभे राहतात आणि गोमुख ते गंगासागर ही २२५० किलोमीटरची गंगा परिक्रमा सहा वर्षं वारंवार करतात. हे सगळंच विस्मय चकीत करणारं आहे. सहा वर्षं कॅमेरा हाती धरून त्यानी गंगेचं मनोहारी त्याबरोबरच विद्रूप रुपं  चित्रीत केलं आणि प्रदर्शनाच्यामाध्यमातून देशासमोर मांडलं. त्या प्रवासाची साहस कथा सांगणारं पंचगंगाते गंगा हे पुस्तक लवकरच वाचकांच्या भेटीला येणार आहे.

गंगेच्या किनाऱ्यावरून बुद्धांच्या पाऊलवाटांवर ते कसे वळले हे त्यांचं त्यांनाच कळलं नाही. सहा वर्षांची ती गंगा भ्रमंती करीत असतानाच त्यांची पवलं पुढे तथागत गौतम बुद्धांच्या शोधात निघाली, तथागताची ती पवित्र पावलं जिथे जिथे पडली त्या अनेक ठिकाणांची यात्रा मुडशिंगीकरांनी नंतर केली. या यात्रेत प्रसिद्ध  छायाचित्रकार प्रकाश शेट्टी त्यांच्या मदतीला धाऊन आले. लुंबिनी या गौतम बुद्धांच्या जन्मस्थानापासून सुरू झालेला तो प्रवास जिथे गौतम बुद्ध पंचतत्त्वात विलीन झाले होते त्या कुशीनगर या ठिकाणी संपतो.  

भारत, नेपाळ, श्रीलंका आणि थायलंड या देशातून भ्रमंती करीत असताना सांची, लुंबिनी, कपिलवस्तु, बोधगया, सारनाथ, नालंदा, वैशाली, श्रावष्टी,  सांकिसा, लडाख, अजंता केव्ह्ज,  बोरिवली, थायलंड, खुशीनगर, अनुराधापुरा अशा अनेक ठिकाणी फिरून त्यानी  हजारो छायाचित्रं  कॅमेर्यात  टिपली. त्यातलीच मोजकी छायाचित्रं आणि त्यांची माहिती त्यानी या पुस्तकात दिली आहेत. सांचीचा स्तूप, लुंबिनी हे बुध्दांचं जन्मस्थान, मयादेवी मंदीर, जिथे बुध्दांना ज्ञानाप्राप्ती झाली तो बोधगयेचा बोधीवृक्ष, चक्रमरा स्थळ, सारनाथ मंदीर, इसीपाटण, राजगीरची कुटी, नालंदा विद्यापीठ, वैशालीचा स्तूप, लडाखच्या हेमीस आणि थीकसे गुंफा, तिथला लडाख महोत्सव’, अजंता लेणी, बोरीवलीचा विश्व विपशन्ना पॅगोडा, थायलंड आणि श्रीलंकेतील बौद्धस्थळं आणि अनेक स्तूप अशी शेकडो  छायाचित्रं  या पुस्तकात दिलीआहेत. प्राचीन वास्तू घडवतानाची अदाकारी, नक्षीकाम आणि शिल्पं जिवंत करण्याचं असामान्य काम छायाचित्रकार विजय मुडशिंगीकर आणि प्रकाश शेट्टी  त्यांनी केलं आहे.

डिस्कव्हरी ऑफ तथागताज फूट प्रिंट हे कॉफी टेबल बुक म्हणजे प्रज्ञा, करुणा आणि शांती यांचा संदेश देणारं तसंच भारताचा पुरातन वारसा जाणून घ्यायची जिज्ञासा पूर्ण करणारं पुस्तक आहे. त्या त्या ठिकाणी जाऊन हे संचित न्याहाळावं अशी तीव्र इच्छा वाचकांच्या मनात निर्माण करण्याची ताकद या पुस्तकात आहे.

शांततेच्या आभास निर्माण करणारी ही छायाचित्र मन शांत तर करतातच पण हा प्रदेश फिरून पाहावा अशी आंतरिक ओढ हे पुस्तक हाती आल्यापासून पाहणाऱ्याच्या मनात लागून राहते.  एखाद्या जवाहिर्याने अत्यंत मन लावून कलाकृती घडवावी तेवढीच मेहनत ही छायाचित्र काढताना घेतल्याचं पानोपानी जाणवत राहतं. तलावाच्या पाण्यावर वाऱ्याने उठणारे तरंग देखील  अचूक टिपणारा कॅमेर्यामागच्या डोळ्यांला दाद देत राहावीशी वाटते. बौद्ध भिक्कूंचं समर्पित जीवन,  त्यांची देहबोली यांचं यथार्थ दर्शन या पुस्तकातून घडतं. राजस्थानी शिल्पकारांनी विसाव्या शतकाच्या उत्तरार्धात घडवलेली मूर्ती पाहून प्राचीन कला अजुनही भारतात जिवंत असल्याची साक्ष देते. कागदावर झालेलं छाया आणि प्रकाशनचं नेमक अवतरण डोळ्यांचे पारण  फेडतं.

तथागताच्या पदस्पर्शाने पावन झालेली ही ठिकाणं या पुस्तकात पाहताना अनेक यात्रांचे नेत्रसुख वाचकाला देतात. इतिहास संस्कृती आणि प्राचीन कला याचबरोबर प्रेक्षणीय स्थळदर्शनाचा आनंद हे पुस्तक पाहताना होतोच होतो.

मनोहारी छायाचित्रं, सुबक रचना, उत्कृष्ट छपाई,१४x१०”  आकार, फोटो पेपर आणि नेमकी माहिती यामुळे पुस्तक संग्रहणीय झालं  आहे.

डिस्कव्हरी ऑफ तथागताज फूट प्रिंट
विजय मुडशिंगीकर,प्रकाश शेट्टी 
प्रज्ञा क्रिएशन प्रि ॅन्ड पोस्ट प्रॉडक्शन प्रा. लि.
९८६९०८६४१९



LinkWithin

Related Posts with Thumbnails
 

Design in CSS by TemplateWorld and sponsored by SmashingMagazine
Blogger Template created by Deluxe Templates Tested Blogger Templates