पाऊस झिम्माड झिम्माड झाsssला

थेंब टपोरे नाचत येती

फेर धरोनी वाssरा

तरु-वेली या नर्तन करिती

अखंड झेलत धारा

पाऊस झिम्माड झिम्माड झाsssला   

पाऊस झिम्माड झिम्माड झाsssला

प्रचंड लाटा उसळत सागर

तुफान घेऊन येssई

अविरत गरजे घोष तयाचा

तमा कुणाची नाही

मासोळ्यांचे थवे सोबती

चांदीचाच पसाssरा 

तरु-वेली या नर्तन......

सैरावैरा पाणी वाहे

थारा त्याला नाssही

कोसळती धबधबे सारखे

पूर दुधाला येई

हिरवी झाली अवघी धरती

आनंदच हा साssरा  

तरु-वेली या नर्तन......

नरेंद्र प्रभू

   

पाऊस आला आला रे !

नील नभातून झरते पाणी

पाऊस आला आला रे

मोर पिसारा फुलवित सार्‍या

वनात नाचता झाल रे

चमकत विज ही वरून आली

गगन भेदीते सारे रे

गडगडूनी ढग फुटून गेले

वर्षावाची हाळी रे  

गुरे वासरे चौखूर उधळूनी 

सैरावैरा झाले रे

ओलेत्याने पक्षी बघती

कुठे आसरा आहे रे

झर झर पागोळ्यांच्या धारा

जमीन ओली झाली रे

बघता बघता ओहळ भरूनी

दौडत दौडत आले रे

आभाळाचे देणे आहे

धरतीसाठी लेणे रे

नील नभातून झरते पाणी

पाऊस आला आला रे

नरेंद्र प्रभू