तुझी सावली लाभली

 

स्वामी स्वरुपानंदाचा स्नेह लाभलेल्या लेखिका मृणालिनीताई जोशी यांचा आज ९४ वा वाढदिवस. नुकतीच या विदुषीची भेट घेता आली. त्यांच्या दर्शनानंतर सुचलेल्या या ओळी आजच्या वाढदीवशी त्याना अर्पण.       

माया आभाळभरून तुझी अनुभवाआली

किती दिसांनी गे माये तुझी सावली लाभली

एका कृपाकटाक्षाने अमृताचा गे वर्षाव

मन चिंब चिंब न्हालं क्षणोक्षणी ती आठव

 

किती प्रकाश दाटला निरांजन तेजाळलं

दाही दिशा तुझ्या झाल्या गात्र गात्र उजाळलं

वर प्रेमाचा वर्षाव जणू आभाळ भरलं

इवल्याशा कुटीमध्ये असे ब्रम्हाण्ड साठलं

 

स्वामी स्वरूप दाविती चित्त थाऱ्यावर एक

हर्ष आनंद जाहला आशीर्वचन प्रेरक

अन् लाभला मजला प्रसादाचा हा ‘आलोक’

तुझ्या कृपाकटाक्षाचा सोनसळी अभिषेक

 

नरेंद्र प्रभू

१३ फेब्रुवारी २०२१

वि. स. खांडेकरांचं निवासस्थान

वि. स. खांडेकर शिरोड्याला शिक्षक होते तेव्हा शिरोड्यापासून दोन किलोमीटरवर असलेल्या आरवली या गावी रहात असत. त्यांच्या त्या नाडकर्णीवाड्यातल्या निवासस्थानी मी नुकताच गेलो होतो. एवढा मोठा ज्ञानपीठ पुरस्कारप्राप्त करणारा साहित्यिक जिथे रहात होता ते घर अजून तसच आहे. ज्या घरात स्वातंत्र्यवीर सावरकर, कवि माधव जुलिअन, यशवंत, गिरीश, आचार्य अत्रे, बा.भ. बोरकर राहून गेले ते घर आता असं आहे.

जयवंत दळवींच्या घरात

शिरोडा, आरवली ही सिंधुदूर्गातली नितांत सुंदर गावं. निसर्गाचा जसा वरदहस्त या भुमीला लाभला आहे तसा साहित्यिकांचा वारसाही लाभलेला आहे. संत सोयराजी आंबयेपासून चिं.त्रं खानोलकरांपर्यंत आणि वि.स खांडेकरांपासून आताच्या आघाडीच्या गुरू ठाकूरपर्यंत अनेक लेखक, कवी या मातीने मराठीच्या पदरी घातले. जयवंत दळवीं हे त्या पैकी एक. नुकताच त्यांच्या आरवलीच्या घरात जाण्याचा योग आला. ज्या घरात, माडीवर बसून त्यांनी अनेक पुस्तकं लिहीली त्या ठिकाणी जाऊन ते घर प्रत्यक्ष पाहताना उर भरून आलं. ती माडी, त्या भिंती, तो जिना, ती विहीर, ते अंगण लेखकाला स्फुर्ती देण्यासाठी अजून तिथे आहे फ्क्त उणीव भासली ती स्वतः लेखक जयवंत दळवींची.