तुझी सावली लाभली

 

स्वामी स्वरुपानंदाचा स्नेह लाभलेल्या लेखिका मृणालिनीताई जोशी यांचा आज ९४ वा वाढदिवस. नुकतीच या विदुषीची भेट घेता आली. त्यांच्या दर्शनानंतर सुचलेल्या या ओळी आजच्या वाढदीवशी त्याना अर्पण.       

माया आभाळभरून तुझी अनुभवाआली

किती दिसांनी गे माये तुझी सावली लाभली

एका कृपाकटाक्षाने अमृताचा गे वर्षाव

मन चिंब चिंब न्हालं क्षणोक्षणी ती आठव

 

किती प्रकाश दाटला निरांजन तेजाळलं

दाही दिशा तुझ्या झाल्या गात्र गात्र उजाळलं

वर प्रेमाचा वर्षाव जणू आभाळ भरलं

इवल्याशा कुटीमध्ये असे ब्रम्हाण्ड साठलं

 

स्वामी स्वरूप दाविती चित्त थाऱ्यावर एक

हर्ष आनंद जाहला आशीर्वचन प्रेरक

अन् लाभला मजला प्रसादाचा हा ‘आलोक’

तुझ्या कृपाकटाक्षाचा सोनसळी अभिषेक

 

नरेंद्र प्रभू

१३ फेब्रुवारी २०२१