पाऊस आला आला रे !

नील नभातून झरते पाणी

पाऊस आला आला रे

मोर पिसारा फुलवित सार्‍या

वनात नाचता झाल रे

चमकत विज ही वरून आली

गगन भेदीते सारे रे

गडगडूनी ढग फुटून गेले

वर्षावाची हाळी रे  

गुरे वासरे चौखूर उधळूनी 

सैरावैरा झाले रे

ओलेत्याने पक्षी बघती

कुठे आसरा आहे रे

झर झर पागोळ्यांच्या धारा

जमीन ओली झाली रे

बघता बघता ओहळ भरूनी

दौडत दौडत आले रे

आभाळाचे देणे आहे

धरतीसाठी लेणे रे

नील नभातून झरते पाणी

पाऊस आला आला रे

नरेंद्र प्रभू