चांदणवेडा गाव

हिर्‍यासारखा हिरवळीतला हवाहवासा गाव
टिपूर चांदणे अजून पडते, हलते आहे नांव

कशी कुणी अन कधी खोदली इवलीशी ही बाव

डोंगर कापीत कुणी काढला रस्ता इथला राव?

खळखळ वाहे निर्झर इथला नाही त्याला ठाव

तळ्यात डुंबत असती कमळे हसत खेळती डाव

आनंदाने आंबा डोले नाही त्याला हाव

स्वागत करतो सकल जनांचे रंक असो वा राव

माड-फोफळी चवर्‍याढाळीत म्हणती पणती लाव   

देवळातली घंटा जागवी मनातला सद्भाव

धुक्यात दडला असे पहुडला चांदणवेडा गाव

मनात हुरहुर, करतो काहूर  हवाहवासा गाव