त्यांना फक्त प्रसादाशी मतलब

निवडणूकीचा खेळ सुरू झाला आहे. निवडणूका जाहीर झाल्यापासून शह-काटशह देण्याचं राजकारण सगळेच राजकारणी खेळत आहेत. गेली पाच वर्ष केवळ आपलीच पोट भरण्यात मग्न आसलेले हे पुढारी आता जनतेची काळजी करण्याचं नाटक तरी करतील असं वाटत होतं. पण ‘कसलं काय आणि दहा पक्षात पाय’ अशी यांची अवस्था आहे. एकदा निवडून आलो म्हणजे तो मतदार संघ आपली जहागीर समजणारे काहीजण तर पक्षनिष्ठा, तत्व वैगेरे बाजूला ठेवून तिकीट देईल त्या कळपात सामील होत आहेत. कसलीच बांधिलकी न मानणारे असे लोक मतदारांशी प्रामाणीक राहूच शकत नाहीत. पुजेच्या मंडपाबाहेर प्रसादाच्या आशेने उभ्या असलेल्या भिकार्‍यांसारखी यांची गत आहे. देव आणि पुजा करणारे या दोघांशी त्यांना काहीच देणंघेणं नसतं, फक्त प्रसादाशी मतलब. नाहीतर, एका रात्रीत निष्ठा बदलणारे कालपर्यंत ज्याला विष्ठा म्हणत होते त्याच पंगतीत कसे बसतात ?


पण जनता म्हणजे काय यांच्या गोठ्यातली गाय आहे ? यांनी कशाचीही सरमिसळ करावी आणि जनतेने ते मान्य करावं. दलबदलू मग तो कोणत्याही पक्षाचा असूदे त्याला घरचा रस्ता दाखवणं हे आता जनतेचं काम आहे

नरेन्द्र प्रभू