असा ‘मान्य’ राजकारणी

काल रात्री नऊच्या सुमारास चर्चगेटच्या दिशेने जणार्‍या लोकलमधून माझा प्रवास चालू होता. सैनिकी शर्ट घातलेल्या एका व्यक्तीकडे माझं सहज लक्ष गेलं, पाहतो तर ते ‘शिवराज्य’ पक्षाचे अध्यक्ष ब्रिगेडियर सुधीर सावंत होते. बरोबर एक सहाय्यक, लोअर परेल स्थानकावर ते उतरले, मलाही त्याच स्थानकावर उतरायचं होतं. या पुर्वी एका समारंभात ब्रिगेडियर सुधीर सावंतांशी माझी तोंडओळख झालेली असल्याने मी त्याना नमस्कार म्हटलं. त्यानीही हात मिळवला. झी वाहिनीवर एका थेट प्रक्षेपण होणार्‍या कार्यक्रमात सहभागी होण्यासाठी ते निघाले होते. “मंत्र्यांचा विमानाच्या खालच्या वर्गाचा प्रवास सध्या गाजत असताना आपण सामान्य माणसांबरोबर प्रवास करता हे पाहून बरं वाटलं” अशी माझी प्रतिक्रीया मी त्यान देवून टाकली.

आमदार, खासदार ही पदं भुषवलेले असुनही कसलाच बडेजाव नसलेले आणि मोठेपणासाठी गोतावळा बरोबर न फिरवणारे म्हणून मला त्यांचा अभिमान वाटला. त्याचबरोबर दिलेली वेळ पाळता यावी म्हणून प्रसंगी लोकल ट्रेनने प्रवास केला ही गोष्ट सुद्धा दखल घेण्याजोगी.

शशी थरूर, एस्. एम्. कृष्णा यांसारखे केंद्रीय मंत्री सरकारी बंगल्यांचा रंग पसंद नाही म्हणून तीन तीन महीने पंचतारांकीत हॉटेलात राहून सरकारचे, पर्यायाने जनतेचे पैसे (पंचतारांकीत हॉटेल साठी दिवसाला एक लाख रुपये भाडं) उधळीत असताना, विमानाच्या खालच्या वर्गाचा प्रवास जनावरांच्या लायकीचा, असले तारे तोडत असताना हा अनुभव मानाला दिलासा देणारा ठरला. राजकारणात असलेल्या काही चांगल्या लोकांपैकी ब्रिगेडियर सुधीर सावंत आहेत एवढं नक्की.

नरेन्द्र प्रभू